Baie keer dink ons dat ons gedurig moet aanpas of met nuwe planne moet kom sodat ons kan voor wees.  Die wêreld voel soms of dit so vinnig verander dat ons self nie eers kan by bly nie.

Soms dink mense in die kerk ook so oor God.  Dan voel dit of alles ’n gejaag word en vir ’n oomblik is dit amper asof mens kan dink dat God ook moet verander om aan te pas by die wêreld wat so vinnig verander.  Ek wonder nogals of die wêreld werklik verander en of ons nie net miskien vasgevang word in besig wees nie?

Hebreërs 13:7-8 herinner ons egter aan ’n baie belangrike waarheid oor Jesus Christus:

Dink aan julle voorgangers wat die woord van God aan julle verkondig het. Let op hulle lewenswandel tot die einde toe, en volg die voorbeeld van geloof wat hulle gestel het.

Jesus Christus is gister en vandag dieselfde en tot in ewigheid.”

Jesus Christus is gister en vandag dieselfde en tot in ewigheid.

Wanneer dit voel of alles rondom ons bly verander, MOET ons onthou, God verander nie!  God hoef nie elke dag voor te wees met die tegnologie en om die slimste planne te hê sodat Hy die meeste mense na Hom toe sal trek nie.  Sekere waarhede sal altyd blywend wees, en ook dieselfde bly.  Dit is dat: God is God!  Ons dien Hom omdat Hy God is!

God hoef nie te verander en by ons aan te pas nie!  Ons hoef ook nie voor te bly met die nuutste ontwikkeling om by God aan te pas nie.  ONS MOET wel rustig word, en besef WIE God is.

Die Hebreërs skrywer verwys na die voorgangers wat die woord aan julle verkondig het.  Dit bedoel sekerlik al die geloofshelde soos, Abraham, Moses, Noag en ander.  Maar ook die mense van hulle tyd wat die boodskap direk aan hulle oorgedra het, hulle ouers, rabbi’s en gelowiges in hul eie tyd.

So ook in ons tyd.  Miskien het jou ouers, ouma en oupa, of iemand anders vir jou as kind so geloofs voorbeeld gestel.  Vir jou vertel van Jesus Christus, van Wie God is en hoe God is,  Onthou weer daardie boodskappe en waarhede, en volg die voorbeeld na!  WANT GOD BLY GOD! HY IS gister en vandag dieselfde en tot in ewigheid.

 Ds. Craig Salzmann                                                                                                                                                                                                                                                              NG Gemeente Heuwelsig te Bloemfontein

INTERNASIONALE DAG TEEN GEWELD EN BOELIEGEDRAG BY SKOLE INGESLUIT KUBER-BOELIE – 7 NOVEMBER

’n Groot aantal skoliere regoor die wêreld staar elke dag skoolgeweld en afknouery in die gesig.  Dit beïnvloed hulle fisies, emosioneel én geestelik.  Opvoeding en onderrig word gekortwiek deur fisiese-, verbale- en kuber-boeliegedrag.

UNESCO-lidstate het die eerste Donderdag van November as die Internasionale Dag teen Geweld en Afknouery op Skool, insluitend Kuberafknouery verklaar.  Daarmee erken hulle dat skoolverwante geweld in al sy vorme ’n skending van kinders se regte op onderwys, hul gesondheid en welsyn is. Hulle doen ’n beroep op organisasies sowel as individue om te help om dié internasionale dag te bevorder, te vier en te fasiliteer.

Onderwysowerhede, leerders, ouers, lede van onderwysgemeenskappe, insluitend die tegnologie-bedryf, word gevra om deel te neem aan die voorkoming van alle vorme van geweld in skole.  Die bevordering van veilige leeromgewings is baie belangrik vir die gesondheid, welstand en ontwikkeling van alle kinders.  ’n Slagoffer van boeliegedrag word vir die res van sy/haar lewe daardeur beïnvloed.  Selfs al dink jy jy het dit agter jou gesit, kan klein dingetjies weer die ou magtelose en hartseer gevoel terugbring.  Dan moet jy weer sterk staan en jouself oortuig jy is in beheer en niemand kan jou geluk kom steel nie.

Die voorsitter van die portefeuljekomitee van die polisie in die parlement, Ian Cameron, is ’n misdaadvegter van formaat.  Ons almal onthou met trots, maar ook verontwaardiging, die insident tussen hom en die destydse minister van polisie, Mnr. Beki Cele, in 2023.

In werklikheid is Ian ’n sagmoedige kêrel wat eerder ’n vredevegter as misdaadvegter wil wees.  In sy gesin en by die huis is hy ’n ou ”softie”, want dit is waar hy ontspan en veilig voel.  Hy het egter ’n broertjie dood aan boelies en ’n weersin in onreg van enige soort.   Op Laerskool het Ian bril gedra en was gereeld die slagoffer van boelies.  Sy bril is gereeld van sy gesig af geklap.  Vandag nog wil hy slange vang as iemand hom net agter die kop tik.  Boelies vat nie sommer iemand aan wat teen hulle sal opstaan nie.  Hulle knou graag die af wat  ”anders” as die res is. Maklike teikens is die wat oorgewig of ondergewig is, van ’n ander ras of geloof is, swaksiende is en ’n bril dra, en natuurlik loop die arme rooikoppe erg deur.

Maar hoekom boelie kinders?

In 2024 word daar geweldig baie klem gelê op die lelike sy van boelie-wees en is daar streng anti-boeliemaatreëls in skole.  Kinders weet baie goed wat is reg en verkeerd, maar tog hou hierdie gedrag nie op nie.  As hulle nie hulself fisies of verbaal by die skool kon laat geld nie, word hulle smiddae Kuberboelies.

Ons moet onsself staal teen boelies in die werkplek en ons kinders leer om die boelies op skool te trotseer.  Maak seker jy het ’n oop en toeganklike verhouding met jou kinders, sodat hulle altyd die vrymoedigheid sal hê om oop kaarte met jou te speel.  Moenie altyd die geveg vir hulle gaan veg nie.  Leer hulle om dit self te hanteer.  Maak seker jy weet wat op jou kind se selfoon en sosiale media aangaan.

Ons kan ons kinders nie altyd beskerm nie.  Hulle moet leer hoe om die afknouers te hanteer, want regdeur hulle lewens sal hulle met diesulkes te doen hê.  Elke sitsuasie en elke boelie is anders.  Soms moet jy veg, maar soms is dit beter om te vlug.  Soms moet jy die boelie se gedrag aan die groot klok hang, maar net die volgende keer is ’n stilbek ’n heelbek.  Onderwysers probeer hul bes om die boelies op skool vas te vat, maar loop self ook deur onder kinders wat hulle boelie.  Rottang swaai en houtlepel inlê is lankal nie meer ’n opsie nie.  Elke dag se dissipline en respek probeer afdwing is ’n uitdaging.

Die beste wat ons kan doen is om vir elke slagoffer, maar ook vir elke boelie daar buite te bid.  Jesus het self deurgeloop onder boelies.  Hy weet en verstaan ons smeking.  Laat ons dan almal vanjaar op Internasionale Dag teen Geweld en Afknouery op Skool, spesiaal intree in gebed vir ons skole.

Bronne:  Kwela, 21 Oktober 2024, kanaal 144

www.skole.co.za / Sarina Prinsloo

Bydrae deur Duif Brand

UB-lid Noord-Kaap

PANEELBESPREKING – GRIT:  Guts, resilience, initiative and tenacity

(Aanvoeling/Instink, veerkragtigheid, inisiatief en volharding)

 Aangebied deur: Magdie de Kock. Wêreldpresident van ”Associated Country Women of the World”

 Inleiding en bekendstelling van my werk as die Wêreldpresident van ACWW:

Ek het die wonderlike voorreg om vir die afgelope 10 jaar op die Raad van Trustees van die grootste vroue-organisasie in die wêreld te dien –   die afgelope 4 jaar as Wêreldpresident, en pas her-verkies vir nog ’n termyn van drie jaar.

GRIT DIE DAMESKRINGBERAAD 2023 (Magdie de Kock)

GEWELD EN BOELIEGEDRAG IN SKOLE, ASOOK TEEN KUBERBOELIE
Meer as die helfte leerders op die skoolbanke het al deurgeloop onder ‘n boelie of boelies! Dit
is skrikwekkende syfers en is aan die toeneem. Ouers, onderwysers, grootouers, niemand
moet dit ligtelik opneem nie. Ons kinders verdien ’n veilige gemeenskap waarbinne hulle kan
leef, lag en floreer.
Ons moet ons kinders ernstig opneem as ons vermoed hulle word geboelie. Moenie dink dit
gaan oorwaai nie, moenie dadelik dink die fout lê by jou kind nie. Help hulle, leer hulle
lewensvaardighede wat hulle vorentoe, selfs in die werkplek eendag, goed sal kan gebruik.
Jou kind moet weet dat jy altyd daar is vir hulle, altyd met respek na hulle sal luister sonder
om te oordeel en dat jy hulle te alle tye sal beskerm. Luistervaardighede, m.a.w. om kalm te
bly en nie te oorreageer wanneer jou kind oor hierdie onderwerp of oor voorvalle wil gesels
nie, om te wys jy gee werklik om, m.a.w. om tyd te maak om te kommunikeer, om te hoor wat
nie gesê word nie, om die kind te help om taal te vind vir sy/haar emosies en om sensitief
respekvol met sulke gesprekke om te gaan, is uiters belangrik.
Daar is tog ’n verskil tussen gewone tergery teenoor konfliksituasie teenoor boeliery. Leer
kinders die verskil herken lank voordat hulle slagoffers van boeliery word. Leer jou kind van
vroeg af boeliery is onaanvaarbaar en leer hulle eerder om die verskille tussen mense raak te
sien, te aanvaar en te waardeer. Leer jou kind respek vir alle konings en diensknegte.
Daar is verskeie tipes boeliery, waarvan kuberboeliery die grootste gevaar is vir enige kind of
tiener wat toegang tot ’n selfoon het. Kuberboelies gebruik graag sosiale media as platform
vir hulle teistering, want hulle dink hulle sal nie uitgevang word nie en hulle het meer moed
omdat hulle gesigloos, anoniem en geïsoleerd te werk kan gaan. Kuberaanvalle is geweldig
indringend, baie persoonlik, wreed en dikwels nimmereindigend. Kuberboeliery het
verreikende gevolge en kan selfs tot selfdood lei. Leer jou kind ook hoe om oor hierdie sake
te kommunikeer.
Kinders wat seer het, maak ander kinders seer. Boelies kom dikwels uit wanfunksionele huise
waar hulle min of geen liefde ontvang nie, waar hulle misken word en dikwels self ly onder
boelie- of aggressiewe gedrag. Leer hulle hoe om met ongemaklike emosies om te gaan.
Bou hulle selfvertrouevlakke, hulle onafhanklikheid en selfbeeld. Empatie is die mees
verwaarloosde emosie in ons tyd waar elkeen net vir homself leef.
Die belangrikheid van selfwaarde kan nie onderskat word nie. Selfwaarde moet van geboorte
af gekweek word, nie deur pryswoordjies en luide toejuiging nie, maar met respek,
waardigheid, bemagtiging en goeie openlike kommunikasie.
Van kleutertyd af moet ’n kindjie geleer word dat hy/sy wonderlik en volmaak geskape is en
so ook ander. Bou jou kind se selfbeeld en geestesgesondheid op ’n deurlopende basis met
voort-durende kommunikasie en leer hulle vaardighede wat nodig is om moeilike situasies te
hanteer. Leer en modelleer vaardighede soos probleemoplossing, impulsbeheer,
woedehantering en selfdissipline en bemagtig hulle om positiewe maniere te vind om
viktimisering doeltreffend aan die lig te bring en te help stuit.

Bydrae deur Elize Barnardt

Bronne: afrikaans.com
Lees meer skakels: AfriForum se Teenboeliegids.  https://afriforum.co.za/afknouery-in-skole-is%20jou-kind-dalk-die-boelie/

Paneelbespreking Willem Jordaan

 Wanneer  ‘n mens ouer word, raak dit vir almal ‘n belangrike besluit:  moet ek my huis verkoop en na ‘n aftree-oord verhuis?  Dit is verkieslik en belangrik dat elke persoon of egpaar self daardie besluit neem. Dit vergemaklik die  aanpassing.  Indien kinders of omstandighede jou dwing om af te skaal, is die  aanpassing soveel moeiliker.

Dit is belangrik om te besef dat ‘n aftree-oord nie primêr bedoel is vir verswakte bejaardes nie. Dit is ‘n veilige tuiste vir mense wat wel nog onafhanklik kan en wil  leef. Tehuise vir Bejaardes versorg verswakte persone.

Die volgende moontlike probleme moet in ag geneem word:

• Daar is sekere vereistes waaraan jy moet voldoen om in ‘n aftree-oord toegelaat te word. Hulle stel hulle eie ouderdomsperk vas, die aansoeker  moet die versekering kan gee dat hy of sy nog onafhanklik kan bly en die finansiële vermoë het
• Beide jou fisiese spasie en jou privaatheid gaan beperk word
• Psigiese spasiebeperking hang van die individu  af. Indien kontak met die wêreld buite die oord behou word met kinders, kerk en organisasies, kan met die lewe soos voorheen  aangegaan word.. Die aftree-oorde het ook baie bedrywighede waaraan deelgeneem kan word.
• Kleiner leefspasies, soos  woonstelle bemoeilik die onthaal van vriende .
• Daar is sekere reëls waarvolgens sekere dinge gedoen moet word. Dit kom eintlik net neer op goeie maniere en die inagneming van mede-inwoners.
• Daar is meestal goeie sekuriteit in die oorde wat dit ‘n regte “sluit en ry” ervaring gee. Sekuriteit is baie beter as in normale woonplekke..
• Die koste om in ‘n sorgeenheid in ‘n aftree-oord te bly is deesdae baie hoog.  Dit geld ook vir die dienste van opgeleide versorgers. Sommige aftree-oorde het egter ‘n tariefbeleid waarvolgens dienste van versorgers verkry kan word  vir bv net ‘n uur per dag vir noodsaaklike behoeftes.

Besin oor die tipe verblyf wat nodig is. Huise en woonstelle  kan in ‘n in ‘n aftree-oord gekoop of gehuur  word, of lewensregopsies kan uitge-oefen word..

Lees die fynskrif op enige kontrak baie deeglik.!

Kies ‘n Aftree-oord wat aan joú vereistes voldoen. Party het meer ruimte as ander., In party kan jy jou eie tuin maak, party laat troeteldiere toe, ander nie. Party het meer huise en ander meer woonstelle. Die aanpassing in ‘n huis sal makliker wees as in ‘n woonstel indien  jy nie gewoond was aan woonstellewe nie.

Besin en besluit vóór omstandighede of familie  jou daartoe dwing!

Geksryf deur:  Rina Grové van Brackenfell Simfonietak

Afrikaans vier op 8 Mei 2025 honderd jaar van bestaan as amptelike taal en dié feesvieringe, as deel van die Afrikaans 100-veldtog, gaan landswyd plaasvind. Planne vir dié feesvieringe is bekend gemaak by ʼn funksie wat op Maandag, 8 Mei 2023 by Kleinkaap in Centurion gehou is.
Die oorsigkomitee van die Afrikaans 100-veldtog is op soek na ʼn persoon wat as nasionale koördineerder vir hierdie veldtog kan optree. Die persoon sal op ʼn vastetermynkontrakbasis vir 24 maande aangestel word vanaf 1 Julie 2023 tot 30 Junie 2025. Die tydperk van 1 Julie 2023 tot 31 Desember 2023 sal op ʼn halfdagbasis wees.

Vir meer inligting:

Afrikaans 100 Nasionale Koördineerder finaal